lipu ni

luka pona li seme?

luka pona li toki luka lon kulupu pi toki pona. sama toki pona la ona li jo e nimi pi mute lili. taso nasin toki li ante lon nasin mute. nimi ‘li’ en nimi ‘e’ li lon ala. nimi pali en nimi pi ijo pali o nasin ante. ‘mi moku e kili’ li kama MI KILI MOKU.

ni taso ala la nasin li ante. taso tan seme la ni li kama? ante nasin li tan ni: nasin pi toki luka li sama toki luka lon pi kute ala. jan pi kute ala li kepeken toki luka li olin e toki luka. toki luka li wawa mute. luka pona li kepeken wawa pi toki luka lon.

tan ni la luka pona li ken ala weka e ni: nasin jan pi kute ala li lon. luka pona o lukin wawa e nasin jan pi kute ala o toki tawa ona.

luka pona li seme ala?

luka pona li lili. toki luka pi kute ala li suli. o kama sona e luka pona taso ala. o kama sona e toki luka pi ma sina kin.

tenpo la jan li toki sama ni. ‘a, mi sona e jan pona. ona li ken ala toki uta. ona li toki kepeken toki luka ona. mi wile toki tawa ona. mi o kama sona e luka pona.’ ala. sina wile toki tawa jan pi toki uta ala la o kama sona e toki luka ona e luka pona ala.

o pana ala e sona pi luka pona tawa jan lili pi kute ala tan pilin ni: a luka pona li lili! mi en jan lili li ken toki kepeken pali lili la mi kepeken ni a! ala. o pana e sona pi toki luka pi kute ala tawa jan lili.

o toki ala e ni: ‘a, luka pona li pona mute! toki luka ale ante li suli ike li nasa luka. jan pi kute ala o kama sona e luka pona tan ni: ona taso li pona!’ ni li ike. sina pilin sama ni la mi wile ala e luka sina lon kulupu mi.

nasin seme la luka pona li ilo pi ken toki?

wile pi luka pona li ni: sina pi kute ala en sina pi toki uta ala li awen wile musi lon kulupu pi toki pona la sina ken.

o sona: sina a li wile kama sona toki pona la sina nasa mute. tan ni la kulupu pi toki pona la jan nasa mute li lon. jan pi mute lili la nasin pi nasa ona li ni: tenpo la, ona li kama ken ala toki kepeken uta. kulupu pi luka pona la jan pi nasin ni li lon li pilin e ni: luka pona li ken ilo toki pona.

tenpo ni la jan mute ala pi kute ala li sona e luka pona li wile kama sona e luka pona. taso mi wile e jan pi kute ala lon kulupu pi luka pona. jan pi kute ala pi sona luka li mama pi toki luka. ona li weka tan luka pona la ni li sama ni: mama pona li lon ala. kin la, jan pi nasin ante mute o lon kulupu pi toki pona. jan pi kute ala li weka tan mi la ni li toki e seme?

kulupu li luka pona lon seme?

suli la kulupu li lon ilo Siko lon ma pona pi toki pona lon ma pi kama sona lon ma lili ante kin. ma ale ni la tomo toki pi luka pona li lon li nasin ilo nasa ni: toki kalama li ken ala lon ona.

suli la jan Lakuse li pana e sona pi luka pona lon ma ale ni. tenpo la kulupu li luka pona lon ma. jan Tepo li lon poka pi ma Sanpansiko li kulupu pi toki pona lon tenpo mute. ona li pana lili e sona pi luka pona lon ni. tawa kulupu pi toki pona la jan Lakuse li tawa ma Sanpansiko li tawa ma Kolowato li tawa ma Sikako la ona li pana e sona pi toki pona tawa kulupu lon ma ni ale.

jan seme li awen e lipu ni?

tenpo ni la jan Lakuse li pali mute e toki pi lipu ni. jan Tepo li pali ilo e lipu ni.

tenpo mute la jan Lakuse li pana e sona pi luka pona. o toki tawa jan Lakuse kepeken ilo pi pana lipu: tokipona (sike lili) sasalin (sitelen a) gmail (sike lili) com. ante la o toki tawa jan Lakuse kepeken ilo Siko lon nimi ‘@raacz106.’

jan Lakuse li sona lili e toki luka Mewika. taso sona ona li lili. ona li ken pakala lon tenpo. tenpo mute la jan Lakuse li toki tawa jan Olipija. jan Olipija li open e luka pona li jan pi kute ale ala li kepeken toki luka Juke.